絲絲講場：美聯黃錦康「封咪」
平時見美聯集團（01200）高級執行董事黃錦康（Albert）總係笑騎騎，好似冇乜煩惱咁，尋日佢忽然好激動，話要「封咪」兩年，唔再接受訪問講樓市，令絲絲為之錯愕。
絲絲回想喺呢兩星期又覺得有迹可尋，話說樓市冇因為政府出手打壓而冷卻，反而因為坊間盤源買少見少，業主反價、封盤之聲不絕，可憐一班冇殼蝸牛，追極都買唔到上車盤。Albert見到時下現象，喺上周力數政府增供應而買家仍追入市屬「非理性亢奮」，繼而佢尋日就話「封咪」。
供樓負擔被低估
Albert計條數畀絲絲睇，話依家供樓負擔比率表面上係維持喺近四成嘅健康水平，不過若細心分析，考慮埋樓齡因素，負擔比率實際已升至近六成水平，照咁睇，供樓負擔比率或被低估，出現咗樓市「錯誤安全感」及「溫水煮蛙」效應。若樓價及息率一齊上升，供樓負擔比率或會直逼九七年嘅93.2%水平，你都咪話風險唔高，佢呼籲置業人士入市時要審慎考慮。佢事後話，選擇「封咪」兩年係因認為未來兩年樓市都唔會有乜大改變。