絲絲講場：大新人壽力谷宣傳
大新人壽行政總裁周詠姬（Eleonore）喺去年八月上任，絲絲尋日終於首次同佢見面，Eleonore雖然作風低調，但宣傳策略就相當進取，務求打響大新人壽嘅招牌，而其中一招就係搵到有「金茶王」之稱嘅沖奶茶師傅賴旺明，做佢哋嘅代言人。
賴師傅三十年嚟努力不懈，只為沖杯香滑奶茶，憑住獨門秘方成為全港沖奶茶比賽冠軍。Eleonore話賴師傅呢種精神，與佢哋嘅口號「做好，就係香港精神」好相近，所以邀請佢做代言人。
冀5年內躋身十大
為咗配合宣傳攻勢，Eleonore更透露嚟緊差唔多每個月，大新人壽都會推出新產品，務求喺5年內成為本港十大保險商之一。
睇見Eleonore滿肚密圈，佢嘅同事同絲絲講，話以前佢哋搞活動時，經常被人將大新銀行與大新人壽混淆，但依家就明顯改善咗，大家都知兩者嘅姐妹關係，可見宣傳策略相當成功。