一直被指披住神秘面紗嘅華為，雖然貴為全球第二大電訊設備供應商，但喺印度、美國都畀人質疑佢哋可能危害人哋嘅國土安全，英國甚至唔敢要佢哋送畀倫敦地鐵價值5,000萬英鎊嘅地下網絡訊號。華為終於忍唔住，前幾日喺網站發聲明澄清長期不實嘅謠言，仲歡迎美國正式調查佢哋喎。
呢份聲明係由華為副董事長兼華為美國董事長胡厚崑發出嘅，佢話華為投資美國10年，員工已超過1,000人，但部分人對華為有誤解，當中包括知識產權糾紛、中國政府嘅財務支持及威脅美國國家安全等。
胡厚崑話，華為喺八七年於深圳成立，係一家由員工百分之百持股嘅私營企業。有傳言話華為與中國人民解放軍有「密切聯繫」，係因為華為創辦人兼CEO任正非曾經喺解放軍服役，佢猛話服過役嘅CEO，無論喺中國或美國都好平常o架，根本就冇任何證據指華為與軍方技術有關。
華為將謠言逐項澄清，希望美國對華為所有嘅質疑做正式調查，幫佢哋平反，證明佢哋係一家真正嘅商業公司。姿態做晒係啱嘅，但係啲美國人又會唔會查呢？
余絲韻