證監會行政總裁韋奕禮臨別秋波，將喺下周聯同財經事務及庫務局以及金管局去美國紐約推介香港，如無意外，今次遠行應該係韋奕禮任內最後一次大型官方訪問活動，佢亦非常識做盡量配合，除咗會喺下周二嘅「重頭戲」──國際研討會上發言，聽聞投資推廣署已喺美國幫佢安排咗最少5個傳媒訪問。睇嚟佢今次行程都會非常緊湊，絕不輕鬆呢！
絲絲覺得，韋奕禮始終喺香港工作多年，對香港有一定感情，中國人有所謂「好來好去」，佢最後一次以證監會行政總裁身份宣傳香港，梗要落力啲，留番一個美好印象給大家喇！
韋奕禮早前就同絲絲講，話離別在即，六月八日就係Last day，感覺真係好唔捨得香港。
下周嘅國際研討會喺紐約廣場酒店舉行，將討論兩個主要議題，第一個議題係香港作為通往中國嘅門戶以及喺全球經濟所扮演嘅角色，第二個議題係香港作為亞洲主要資產管理中心嘅發展。
除咗韋奕禮外，財庫局局長陳家強及金管局副總裁余偉文亦會喺研討會上發言。研討會嘅其他講者仲包括德意志銀行、瑞信、高盛、大摩及滙豐等代表。
余絲韻