絲絲講場：冼國林睇重西樵夢工場
功夫及財技同樣了得嘅國藝控股（08228）主席冼國林，自從去年娶咗個靚靚老婆羅寶兒後，仲扶助老婆做埋副主席，拍住上一齊打天下。唔知係咪巧合，就連國藝嚟緊一個大型項目「西樵夢工場」，都喺佢老婆家鄉佛山度搞。冼師傅話呢個「西樵夢工場」項目得到當地政府大力支持，就連當局去招商都以呢個做賣點，同時項目已帶動當地樓價升咗三、四成。
「西樵夢工場」集合咗影視拍攝基地、酒店、主題樂園及天然湖泊於一身，目標係打造為中國首個城式主題公園，整個項目需資8億元，會分階段投入及落成，冼師傅對呢個項目嘅發展前景好有信心，因為依家已開始有公司接洽去拍戲、表演等。
國藝籌拍洪拳電影
公司其他業務方面，冼師傅話嚟緊拍完《葉問終極篇》後，未來會繼續拍功夫片，弘揚中國武術文化，依家開始策劃一套洪拳電影，但公司唔會限制片種，若有好嘅題材，時裝片都會接，不過佢強調公司每年只會維持製作兩至三部電影，貫徹做到「國藝出品，必屬佳品」嘅原則，「粉絲」們惟有畀啲時間等吓啦！
余絲韻