揀人民幣做長倉
話說《華爾街日報》舉辦咗一個外匯圓桌會議，會議邀請咗3位著名嘅經濟學家，要求佢哋為未來5年各自揀出一隻外幣持長倉及持短倉，結果呢3位經濟學家不約而同咁揀咗人民幣做長倉。
外國經濟學家都咁睇好人民幣，怪唔得中央咁驚熱錢湧入內地博人民幣升值啦。
長倉目標一致，但短倉選擇就唔一樣，其中國際貨幣基金組織前中國區負責人Eswar Prasad話會沽空歐元，主要因為依家歐元區主權債務問題及經濟前景唔樂觀。曾經喺聯儲局委員會工作嘅Joseph Gagnon就選擇沽空美元，連美國經濟學家都選擇沽美元及買人仔，大家收到冇？
余絲韻