絲絲與光大控股（00165）老友打牙骹，聽講佢哋依家喺總部所在地─遠東金融中心多租一層樓計劃大展鴻圖，絲絲一向都知佢哋依家租緊嗰幾層，係向大股東光大集團租嘅，心諗今次都一定唔例外，點不知老友話唔係，事關光控發展得好快，母公司租畀佢哋嗰啲寫字樓已經唔夠用，所以今次佢哋喺市場租番嚟，仲租咗全層10,800方呎樓面。
至於租金幾多，老友就唔肯講，話總之係按市值租金計就啱喇。不過話時話，究竟光控擴展乜嘢業務？老友話佢哋主要係因應旗下光大證券（國際）與內地嘅光大證券業務合併後會增聘人手，所以原本光大證券只佔現有租用寫字樓嘅半層，會改為畀全層佢，另外一啲其他業務就會搬入新租用嘅樓層。
依家中資證券行已經今時唔同往日，間間都話要擴充業務增加人手，仲有好多人喺外資行跳槽到中資行，貪佢哋嘅前景一定好過外資行。
據聞今年市場有啲中資投行嘅花紅都幾和味，由10個月至30個月糧不等，咁當然要擴充業務再搵多啲喇。
余絲韻