駐紮香港嘅中資機構連年有增，絲絲喺中環食晏，周圍嘅人都係「煲冬瓜」一族。絲絲早前與中遠國際（00517）嘅老友食飯，講開佢哋鍾唔鍾意喺呢間公司做，老友話香港嘅中資公司普遍福利唔錯，但歸屬感呢家嘢，就間間公司都唔同，好似中遠國際咁，佢就好鍾意喺度做嘞，事關佢哋喺香港本部嘅三十幾個同事，大家嘅感情好好，連返工都唔使打卡。
點解會有咁好感情，佢話呢幾年公司好着重團隊精神及歸屬感，成日都鼓勵員工參加好多活動，仲出錢出力與員工一齊身體力行，例如早排苗圃行路上廣州咁，公司都有鼓勵員工自由參加，仲捐埋錢。為咗提升同事之間嘅合作，去年又安排員工去清遠參加一項外展活動，雖然成個活動只有兩日，但都幾辛苦，各同事做每一類活動都要一齊進行，如果唔係就好似骨牌效應咁，一個跌低就全隊覆沒，都幾好玩。近期公司亦好鼓勵員工參加社會上舉行嘅各類型比賽，例如馬拉松跑步咁，希望員工喺返工之餘都可以同時發展其他興趣，達到身心健康喎！
余絲韻