滙控（00005）新任行政總裁歐智華上場冇耐就有好多傳聞，一時傳佢將CEO辦公室搬返倫敦，一時又話佢嘅花紅係全英國最高。今次英國《衞報》就爆料，話歐智華嘅聘用合約喺同一間叫HSBC Asia Holdings嘅公司度簽，而竟然唔係滙控總公司。
絲絲即刻打電話去滙控八吓，發言人就回應話，集團好多年前已經用呢種方式聘用國際性管理層，只係為咗行政方便，並非涉及稅務優惠。至於前任CEO係咪都用咁嘅聘用方式，滙控話既然佢係國際性嘅管理層，照計都係用呢種聘用方式。
但絲絲有樣嘢好唔明，歐智華明明喺上月正式上場，但呢篇報道又話本月簽約，發言人就話唔清楚，成為今年絲絲今年首個謎團。絲絲仲發現一樣幾得意嘅嘢，就係呢篇報道話張合約內容，歐智華嘅辦公室地址係填寫香港，似係否認咗上月有報道話佢將CEO辦公室遷返倫敦嘅傳聞。
一直有睇實「5號仔」發展嘅證券界人士，原來對呢單料都唔係好清楚。有人話之前出面吹風話歐智華要返倫敦，今次爆料可能係間接否認返英國。絲絲就覺得咁多年都冇人知，突然間《衞報》會睇到張合約，話晒係聘用合約，只係會經歐智華及「5號仔」嘅手，話唔定係佢哋自己爆料都唔定。
不過點都好，「5號仔」肯繼續留番個CEO總部喺香港，都叫對香港做番啲貢獻。
余絲韻