市場熱線：潤泥博反彈佳選

孖屐嘅恐慌指數急升，主要係驚「狂人」揚言一鑊熟炸油管，啲北非獨裁領導人一個接一個似骨牌倒下之後，就到回教勢力興起，老美肯定有排煩。

講番港股，尋日成交得655億元，窩輪成交120億元，牛熊證成交56.8億元，即係股票成交478億元，尋日沽空49.2億，有統計話當沽空佔成交一成嘅話，反而個市短期會見底，不妨聽住先！但呢排最搵笨都係圖表派，乜嘢頭肩頂、黃金交叉、死亡交叉、平均線等全部唔準。

預算案又炒冷飯

藍籌股尋日上晝主要升地主股，用股價來嘲笑鬍鬚曾「遠水救近火」之無稽，但下晝亦無以為繼，二三線股繼續跌死人冇命賠，最誇張係供緊股嘅威鋮（01002）先升25%後倒跌10%；南車母子（01766及03898）齊出軌，皆因鐵道部負債1.3萬億人仔，計落數每年淨還息都幾百億，邊有錢再投資高鐵？

財政預算案又炒冷飯，將過往兩年嘅優惠copy多一次，惟獨冇咗退稅，改做每個強積金戶口注入6,000蚊，財爺話唔想刺激通脹喎！但以每年5%通脹同基金嘅收費2%計算，呢6,000蚊到你65歲時可能縮水到得600蚊。仲有嗰50億至100億元嘅通脹掛鈎債券，根本就冇作用，冇錢嘅自然冇錢買，有錢嘅分得一萬幾千債券，不如自己買高息股好過。

未來幾年最旺嘅係建築股，中國建築（03311）新簽合同及成績表都靚爆燈，由8.5元回調到6.61元，夠未？睇圖表最穩陣入貨位係6蚊附近，亦要顧住下月十八日派全年成績表，就算業績好過預期，呢排10隻有9隻都見光死，早幾日有中芯（00981）同安踏（02020），尋日亦見堡獅龍（00592）先升5.5%後倒跌3.3%收場，玖龍紙業（02689）跌5.4%創新低，依家買貨要講耐性，千祈唔好心急，因住低處未算低。

宜留意去年業績

十大基建除咗益建築股之外，當然最益嘅係建築材料，香港嘅水泥大部分係用華潤水泥（01313）產品，而水泥股同汽車股一向係博反彈之佳選，所以手痕想買貨嘅股友不妨考慮吓呢隻，睇走勢佢仍係5.5元至6.4元之間上落，值得候低吸納，而下周五公司會派全年成績表，或者可以睇埋業績亦未遲。

呢排消息股都冇乜反應，住建部已通傳話今年會擴大「建材下鄉」試點，暫時唔知邊處會被睇中，但如果華南有份嘅話，潤泥可以受惠。水泥股炒唔起，除咗因為孖屐氣氛差之外，亦因過年建築項目停工，家陣係水泥業傳統淡季，加上舊年尾又欣逢限電催升水泥價格，所以今年首季價格更顯得回落得快。不過，傳統智慧係趁淡季買貨，到旺季炒高時則甩手，但要考你耐性。

戰報

天工國際（00826）+14%

古晨尋日推介嘅天工甚有睇頭，抽上6.97元高位，較低位6.09元勁升超過14%！

中國水業（01129）+17

桃桃上周三介紹嘅中國水業，當日低位0.132元，尋日最高升至0.155元，累升超過17%。

古勝