已經有百多年歷史嘅港燈（00006）尋日正式改名為電能實業，集團董事總經理曹棨森話呢個新名係集體創作，可以反映公司業務國際化，皆因公司早已衝出香港進軍國際。不過佢哋唔係完全捨棄「港燈」呢個名，佢哋嘅本港電力服務以及總部繼續沿用「港燈」名稱，只不過股民下周三見到「6號仔」時，個名會係電能實業，股民買賣時千祈唔好以為自己眼花。
曹棨森話，今次改名係配合公司嘅發展政策，因覺得「港燈」呢個名會受到地區性嘅限制，所以有需要改名。
佢又話集團「生於斯、長於斯」，香港永遠係集團嘅家鄉，會繼續為本地市民服務。
對於公司改新名，佢非常開心，即時攞張電能實業嘅實物股票與大家分享，佢話電能實業股票顏色仍沿用紫色，設計上與之前有些少唔同，新加上一條條嘅光纖線，代表前景光明及快速增長，不過佢哋都好念舊，公司嘅標誌仍維持不變。
余絲韻