美國總統奧巴馬尋日喺白宮向15位「總統自由勳章」（Medal of Freedom）得主授勳，熱心慈善事業嘅「股神」巴菲特係其中一位獲授勳者。
「總統自由勳章」係美國最高平民榮譽之一，旨在表揚一啲對美國或世界和平作出重要貢獻嘅人，奧巴馬向巴菲特「加冕」時就向對方「笠高帽」，讚揚巴菲特唔單只係全球最富有嘅人，仲係全球其中一位最值得尊重嘅慈善家，一向節儉樸素嘅佢，唔會花費太多金錢喺買奢侈品及打扮方面，反而願意承諾喺自己死後捐出大部分身家，幫助世界各地有需要嘅人，實在難能可貴。此外，巴菲特更加以身作則，不辭勞苦與老友蓋茨到訪世界各地，呼籲一眾富豪踴躍行善，就係呢顆灼熱嘅善心，令佢實至名歸咁獲頒呢個勳章。
奧巴馬講笑咁話，由於巴菲特實在太過節儉，好少買新領呔，所以喺「股神」上次到訪白宮嘅時候，就送咗一條新領呔畀佢，仲話蓋茨下次再嚟白宮嘅時候，可能都會想要一條喎。
除咗「股神」之外，其他獲授勳者包括德國總理默克爾及美國前總統老布殊等，絕對係猛人如雲。值得一提嘅係，被奧巴馬形容為「大器晚成」嘅全球著名華裔大提琴家馬友友亦榜上有名，成功為華人爭光。
余絲韻