絲絲講場：歐智華領軍見貴客

滙豐尋日喺總行3樓搞咗一個新春酒會，喺今年初先至正式上任嘅滙控（00005）行政總裁歐智華以及滙豐亞太區行政總裁王冬勝負責主持酒會，與一班嘉賓摸吓酒杯底，祝賀兔年事事如意。

好多城中富豪亦都畀面出席，酒會喺6點半正式開始，嘉賓魚貫入場，包括有新世界（00017）主席鄭裕彤同埋阿仔鄭家純、新地（00016）副主席郭炳江、中建集團老細許世勳以及許晉亨等。

恒生梁太帶隊搞團拜

至於恒生方面，就由副董事長兼行政總裁梁高美懿（Margaret）帶隊，連同企業及商業銀行業務主管陳力生（Nixon）、商業銀行業務總監林燕勝（Donald）及新上任嘅商務理財業務總監左玫（Rose），喺本周二及周三向大家團拜，用「扇」做主題，寓意風生水起，仲即場請埋財神爺大派利是。

絲絲收到風，Rose喺本月剛啱履新，一樣大派利是，聽聞佢上周親自去到恒生喺港九新界全部商務理財中心，向超過200幾位商務理財業務同事大派利是，實行一人一封，永不落空，淨係派利是都派足幾日；至於Donald，聽講佢派畀自己部門同事都派咗600幾封利是，計吓呢兩位主管派利是嘅總數，認真唔嘢小。

余絲韻