市場熱線：熔盛重工做大做強

雖然隔晚美股下跌，但亞洲時段道指期貨已回升，加埋A股連日做好，所以港股尋日可算係外圍帶動，但一時跟外圍、一時又唔跟，主要都係睇大戶心意。「祖國野獸」（02628）終於重上30蚊，不過多數股份都係一日升、一日跌，冇乜方向，水泥股同碼頭股連日上升可算異數。

商譽損失唔易修補

澳優（01717）發完盈警後，又發生奶粉唔合格遭退貨事件，但尋日喺中銀狂買下倒升收場，公司回購係最大支持力量，不過商譽損失就可能有長遠影響，好似霸王（01338）跟住搞到要見紅，依家股價仲不斷創新低，要睇吓能否守得住兩蚊。「波斯貓」（03998）一度跌穿兩蚊，但尋日已反彈到2.3元，之但係波斯貓PE低、息率高，呢樣係霸王有所不及。

北京尋日出新鬥地主政策，內房股偏軟，呢類股經過新一輪風吹雨打之後，抗體會相應增強，橫掂呢排個市都係炒上落為主，短炒內房股其實冇壞。

聯想（00992）今日派成績表，有資金見戴爾業績好，亦偷步炒聯想，但成績表只係反映歷史，依家聯想主要係睇新產品「樂Phone」同平板電腦嘅競爭力；自從iPad熱賣之後，戴爾電腦+英特爾處理器+微軟軟件嘅成功模式已經顛覆，電腦行業將重新洗牌。

高盛尋日唱衰航運股，皆因話運費低過預期，但航運股已夠殘，被踩多腳都冇再嗌痛。外行人睇波羅的海乾散貨指數（BDI）真係烏卜卜，可以升足一個月，然後跌足一個月。

基本上，舊年股價已講晒畀大家知，太多新船落水搞到運費下降，航運股一路耷，但碼頭股同貨櫃股勝獅（00716）就一路up，至於造船股廣船（00317）則不過不失。

大行唱好可趁低買

舊年尾有造船新股熔盛重工（01101）加入，三個月來表現亦係普普通通，現價仍低過招股價7%，但睇番大行報告，幾乎一面倒唱好熔盛：德銀睇9.6元、中銀國際睇10.55元、大摩睇9.71元、細摩睇9.6元，唔通全部老點？

古勝覺得隻股偏弱未必係睇淡嘅表示，當你見到BDI曾經跌到接近1,000點，運費低迷嘅時候，對造船股亦會睇定啲先。不過，可以肯定嘅係造船股一○年成績表會好靚仔，因為過往接落嘅高價定單相當和味，鋼材成本低亦會推高毛利率，甚至一一年都唔會差，至於將來係點好難講。

祖國一月嘅外貿數據繼續令人跌眼鏡，就算造船業回落，受影響程度較大嘅相信係南韓，趁熔盛股價潛水不妨低吸，遲吓另一造船股新世紀上市更可炒吓影子股效應。

戰報

恒芯中國（08046）+15%

古晨本月一日吼中隻恒芯中國果然有料到，尋日高見1.64元，較推介日低位1.43元升近15%！

上海電氣（02727）+10%

上氣連日由低位抽升，尋日高見4.98元，帥哥上周四推介時低位4.51元，跟佢走轉就賺超過10%。

古勝