證監會嘅人事變動係市場焦點，行政總裁韋奕禮會喺今個夏天離任，絲絲聽聞，負責搵行政總裁繼任人嘅遴選委員會已正式成立咗，將會透過獵頭公司進行全球招聘。
韋奕禮嘅接班人暫時未有着落，但代替前營運總裁簡俊傑嘅人選已喺上月中正式上班，證監會搵咗Andrew Wan做企業事務高級總監。
絲絲聽聞，Andrew Wan以前喺孖士打律師事務所做Regional Chief Financial Officer。
大家可能會問，點解高級總監會做營運總裁嘅嘢？事緣當年簡俊傑提早離任時，有消息話政府希望證監會趁機研究係咪有需要改組架構，以及係咪仍須維持由執行董事出任營運總裁，於是證監會就新設咗高級總監（企業事務）職位代替營運總裁嘅工作。
依家外界成日揣測證監會下任行政總裁係華人抑或洋人，絲絲當然唔知，但可以話畀大家知，Andrew Wan係華人嚟嘅。代替前營運總裁嘅高級總監已名花有主，咁騰空出嚟嘅執董位花落誰家，大家肯定好關心，不妨拭目以待。
（余絲韻）