市場熱線：比電業績惹憧憬

依家嘅情況同舊年尾類似，資金流向「讓股價飛」嘅美國，A股就弱過藥煲，而且新春前例牌淡靜兼驚加息，呢個禮拜都好難大翻身。美股雖然強勢沒法擋，美金亦跌，但金價同油價竟然背道而馳，反而國際棉價創咗新高，農產品價格係今年嘅最大禍根，非洲嘅騷亂有機會燒到其他窮國。

QQ（00700）又升到接近200蚊，總有一、兩隻強勢股幫手頂住個市，間公司宣布用50億人仔成立投資基金，即係用錢收買競爭對手，其實佢嘅對手部分已組成聯盟，情況好似台灣「鴻海」同「非鴻海」嘅對抗。

「股王」保利協鑫（03800）再創新高，原因係中央停批多晶硅新建項目，其實只係維持舊年嘅國策，但因多晶硅價格舊年下半年急升，所以有呼聲叫中央高抬貴手，但如果因一時價升而一窩蜂生產，到咗價跌時就會攬住死。

內需概念長炒長有

老古早兩日話儲定錢等50蚊入恒安（01044），但話口未完隻股呢兩日已上番60蚊樓上，原來係細摩出報告推介。買食品股被喻為對抗通脹嘅其中一個方法，但祖國有「不准加價」呢一招，真正上游股亦少之又少，好似中綠（00904）同超大（00682）令人心驚兼手震。但內需始終係一個恒久不衰嘅概念，不准加價只係短期措施，過埋農曆新年可能會有啲鬆動。另一隻內需股雨潤（01068）亦跌到上次低位，老古對呢隻都有興趣，但可以等佢穿埋底再插深啲至動食指。

雖然老古話暫時向短線股票說再見，但就算個市點弱，部分強勢股仍係咁堅挺，協鑫同數碼通（00315）就係例子，另外隻比亞迪電子（00285）雖然唔係創新高，但自從畀大摩唱好之後，股價即刻脫胎換骨，由3.8元急升到5.3元，距離大摩嘅目標價5.7元已經唔遠。

國產手機薄利多銷

點解隻股可以咁勁，真係考起人，又話勞工成本上漲、又話春節後有民工荒，睇佢嘅對手富士康（02038）仍係死蛇爛鱔咁。不過，富士康做外國牌子生意，其實好睇唔好食，相反比亞迪電子都有本身嘅優勢，佢做國產手機實行薄利多銷，今年話祖國3G進入收成期，其實公司舊年上半年嘅收入已經大增，但佢用低價搶生意策略搞到毛利率大跌，結果股價跌得仲慘。

今次比電股價大升唔會無端端，老古斷估公司亦踏入收成期，一係公司已將啲細嘅競爭對手排擠出局，一係需求實在太過強勁，令到佢可以加價推升毛利率，總之佢全年成績表應該會有驚喜。

戰報

結好控股（00064）+13%

帥哥上周四話結好控股走勢轉強，當日最低報0.54元，昨日逆市升至最高見0.61元，升近13%。

盈天醫藥（00570）+10%

古晨本周一指盈天醫藥好戲在後頭，股份昨日最高升至1.59元，較推介日低位1.44元升逾一成。

古勝