美國名人雜誌《名利場》喺月初與「股神」巴菲特做咗個訪問，當中提過除咗中美能源主席索科爾外，巴郡行政總裁接班人仲有3個內部人選，尋日CNNMoney網站報道話，候選人中最年輕、人稱「索科爾二號」嘅中美能源CEO埃布爾好有機會跑出！
一直緊貼「股神」動向嘅觀察家，對於索科爾以及另外兩位候選人──巴郡再保行政總裁賈殷及鐵路王Burlington Northern舵手羅斯並唔陌生，唯獨行事低調嘅埃布爾嘅資料就唔多。
據CNNMoney起底，埃布爾喺加拿大長大，會計師出身，九二年投身索科爾揸Fit嘅電力公司CalEnergy，自此就拍住索科爾兼併同業，九九年中美能源併入巴郡後，呢對能源孖寶繼續拍住上。索科爾對呢位拍檔讚不絕口，話佢既係傾收購嘅軍師，購併後業務協同工作亦處理妥當，仲好擅長與州政府官員、監管機構打好關係。年僅48歲嘅埃布爾雖然喺中美能源坐正只有兩年半，但年齡將成為佢喺眾人選中突圍而出嘅最強本錢。
（余絲韻）