李寧（02331）早兩日專登發通告，描述去年經營狀況，仲出乎意料咁話會增加廣告開支兩個百分點，搞到股價跌到一仆一碌。尋日有份外國報章話，李寧已經搵咗美國芝加哥嘅品牌諮詢公司Acquity幫佢哋設計廣告，據聞係李寧喺美國市場規模最大嘅品牌廣告，預計五月喺電視、平面媒體及網絡媒體上播放。
李寧行政總裁張志勇話，今年加大美國業務投資，仲會與Acquity Group LLC組建一家合資企業，投資約1,000萬美元，至於美國市場嘅銷售額目標係5,000萬美元。
李寧近期嘅發展都幾多阻滯，搞到股價係咁瀉，尋日先至企穩番。花旗嘅研究報告估計李寧未來兩個財政年度有短期「陣痛」嘅風險，將佢哋嘅目標價由23元下調至17.5元；摩根大通、美銀美林亦降咗李寧嘅目標價，絲絲都希望李寧嘅「陣痛」可以快啲過去啦。
（余絲韻）