大家都知近年內地經濟發展迅速，富豪身家就好似坐火箭咁升，所以每年《胡潤百富榜》都有新面孔。不過胡潤研究所日前公布嘅《中國富豪特別報告》指出，喺胡潤富豪榜成立12年以來，已出現咗24個「問題富豪」「出事」，行賄、資本市場問題及詐騙係三大主因，因此胡潤榜有個花名叫「殺豬榜」。
呢個特別報告話，房地產及基建係「問題富豪」重災區行業，分別有9人及4人，另外仲統計出「問題富豪」平均40歲就出事，45歲被判刑，56歲就被釋放。而呢24名「問題富豪」中，有17人依家仲坐緊監，最為人熟悉嘅係國美（00493）創辦人黃光裕，佢亦係最有錢嘅「問題富豪」，喺去年《胡潤百富榜》排名21。
對於「殺豬榜」呢個稱號，胡潤就好反駁話，呢12年以來共有1,882個富豪上榜，「問題富豪」只佔總數嘅1.3%。但原來除咗呢24名「問題富豪」外，另有21人正接受調查或曾被調查，如果計埋落去，個比例就會升到2.4%。
（余絲韻）