100年減到90年
話說幾年前，恒隆（00101）主席陳啟宗曾問過蒙代爾，美元當儲備貨幣可以做幾耐，蒙代爾當時答「100年」，尋日陳啟宗再問佢同一個問題，雖然投資者依家對美元嘅信心已動搖，但蒙代爾依然好肯定咁答「90年」，化解咗陳啟宗尖銳嘅問題。
事實上，論壇上有唔少人都唔係幾滿意美國大印銀紙，採取放任嘅貨幣政策，不過蒙代爾就唔係咁睇，佢話美元自由流通，無論係央行或者個人，唔鍾意可以唔揸，始終呢個係自由市場。
除此以外，佢又話唔建議人民幣升值，指中國可以承受人民幣輕微升值，幅度太大會引致熱錢流入，令通脹惡化。
（余絲韻）