邀請咗中外唔少金融高官來港演講嘅「亞洲金融論壇」喺前日曲終人散，其中一名重量級嘉賓係中國證監會主席尚福林，佢尋日趁着來港嘅空檔，中午前去咗港交所（00388），喺港交所主席夏佳理及行政總裁李小加陪同下參觀交易大堂。
雖然尚福林過往已嚟過香港，但今次係佢首次參觀港交所交易大堂。港交所為隆重其事，送贈咗一件出市代表紅背心畀佢尚福林，編號係「3826」，認真好意頭。今次尚福林參觀交易大堂，同行仲有中證監國際合作部主任童道馳。
據聞今次尚主席除咗參觀交易大堂外，仲有與港交所管理層會面，但內容係傾啲乜就當然保密啦。不過尚福林喺「亞洲金融論壇」已明言會加強中港金融合作，好似係期貨、鼓勵企業來港上市以及推出「小QFII」等，大家不妨等吓，可能就快有好消息呢！
睇番過往港交所送畀國家領導人嘅出市代表紅背心編號，例如主席胡錦濤嘅背心編號係「8383」，總理溫家寶背心編號係「6638」 ，都不離「生生發發」、「六六大順」等好意頭號碼。
唔講唔知，我哋中國人就話喜歡「3」、「8」等幸運數字，但原來俄羅斯人就鍾意「7」字，真係「各處鄉村各處例」。
（余絲韻）