市場熱線：金山軟件密切留意

港股嘅強勢唔使多講，除咗前日畀和黃（00013）扯低之外，尋日連大落後嘅祖國移動（00941）都發力升兩蚊。祖國今日就公布CPI等重要經濟數據，但港股連觀望都費事，連最弱嘅滬綜指亦回升1.8%。查實CPI最驚嚇嘅時候已見過，預咗加息就唔會有恐慌，所謂風險同不明朗係兩個不同因素。

後藍籌等住接力

其實最強都係美股，企業成績好固然大條道理升，就算花旗銀行隔晚成績表唔合格，或者經濟數據略差，美股亦照升如儀，咁就證明依家係好友話事，而公司業績期只係啱啱開始，所謂「好過預期」本來冇乜大不了，假如你係CEO，你向外界畀嘅盈利指引都會保守啲，到時「超標」就向股東有交代。

港股成交稍過800億元，祖國移動同中鋁（02600）急起直追，下隻落後藍籌係邊隻呢？中國人壽（02628）、華潤電力（00836）、華創（00291）、思捷環球（00330）以及富士康（02038）？

落後總有落後嘅理由，但反彈嘅理由亦係落後，好似富士康，競爭對手比亞迪電子（00285）3個禮拜升咗35%，大孖沙儲夠貨然後發報告睇好，要升話咁易！

雖然大家對今日公布嘅CPI已冇咁緊張，但呢排啲內需股真係好弱，唔計跌到極殘之下反彈嘅霸王（01338），被封為「內需王」嘅恒安（01044）同維達（03331）都跌到一仆一碌，其他可想而知。

尋日創52周新高嗰70隻股票得兩隻係內需類別：皇朝（01198）同敏華（01999），兩隻都係傢俬股，傢俬又同新樓入伙好有關係，無論你買體育用品股、紙巾股、電器股同傢俬股都要跟潮流。

金山軟件（03888）最風光時亦見過9蚊樓上，但自從成績表由一隻高增長股變成退步股之後，股價一路喺4蚊附近浮沉，兩個幾月前曾因騰訊（00700）同360鬧翻之後升過一陣，但呢類虛火好快就打回原形，上個禮拜則因為祖國話提拔軟件業而發圍，當日成個板塊炒起，但幾日過後，金軟仍有韌力，高過當日1毫子，能否升穿4.65元係關鍵，因為舊年八月同十一月升到呢個位就遇阻回頭，而4蚊附近已打橫行咗4個幾月，如果突破就咪走雞。

祖國網遊商機龐大

祖國網上遊戲業務增長好強勁，但競爭亦好激烈，所以金軟被寄予希望愈大、失望愈大，成績表稍有差池即被洗倉，而且要經常推出新遊戲同投入力度研發。

中央個鼓勵軟件政策其實未有詳細內容，但講明會喺融資、稅務、研發同培養人才方面落力，對行業來講係好事，到詳細內容公布時有機會再炒多轉。不過，金軟最緊要睇業績，個遊戲多唔多人玩，用家同管理層心知肚明，股價或有啟示作用。

戰報

泓淋科技（01087）+12%

帥哥周一認為泓淋走勢轉強，推介時低位2.62元，昨日一度高見2.95元，累升近12.6%。

創維數碼（00751）+12%

桃桃周一指創維銷售數據理想，值得跟炒，昨曾升至5.24元，較推介日低位4.68元，升近12%。

古勝