尋日絲絲經過港大，見到唔少嘅熟悉花旗臉孔，包括香港區行長章晟曼、環球個人銀行服務副總經理周永贊（Simon）及香港區市務總監容蘭芳（Maggie）等，真係數都數唔晒，唔通佢哋集體返學堂進修？
原來佢哋係參加「開學禮」，因為花旗大學今年與港大合作，開辦銀行課程畀該校學生報讀，花旗一眾高層將執教鞭，Simon會教零售銀行服務簡介，Maggie就教市場推廣及品牌管理，向46位被取錄學生分享心得。
章晟曼同絲絲講，話銀行家唔係淨係識搵錢，仲要平衡社會及環境嘅需要，所以今年特登增設「企業社會責任」專題，令呢啲明日商界領袖有全面發展。佢仲話好懷念喺學堂時嘅生活，希望學生好好珍惜呢段時光。
其實花旗已係第7屆搞呢個課程，唔講唔知，首3屆課程係與港大合辦，之後3屆改為與中大合作，今年就回歸港大。雖然絲絲唔知箇中考慮，但睇得出花旗對課程好重視，每年都認真考慮教學夥伴，難怪港大校長徐立之都話，期待與花旗發展更緊密嘅合作關係。
（余絲韻）