絲絲成日與口甜舌滑嘅男士講：「信你一成都死」。呢句說話喺金融市場嘅「小道消息」中都應驗咗，《彭博社》做咗個統計，喺○五年至去年，市場上最少有涉及717家公司嘅1,875宗購併傳言，當中只有104宗成真，以宗數計，半成都冇。
Boston Advisors投資總監Michael Vogelzang教精大家，佢話絕對唔好因為傳聞而「追入」股票，因為你永遠唔知你係第幾個收到風嘅人，分分鐘「接火棒」，購併概念落空嗰陣搞到成手「蟹貨」。
不過富貴險中求，如果你夠膽信小道消息兼且啲料係堅嘅話，回報都相當唔錯。彭博社資料顯示，購併傳言公布後初期，成為購併對象嘅企業股價會因而上升2.9%，你可能會問：「喺我收到風嗰陣，股價都已經升夠啦，邊度仲有得執？」原來研究結果發現，你唔使預先推測邊隻股票有購併概念，只要喺聽到傳聞後即刻動手做嘢，好大機會「一擊即中」。
數據亦顯示，企業經過金融海嘯「勒緊褲頭」嘅時期後，手頭現金充裕，令購併交易愈嚟愈頻繁，50家通訊社及券商報道嘅購併傳聞數目喺○八年見底後，去年按年激增71%至611宗，即係話可以運用呢個策略嘅機會大增。雖然有咁嘅統計，絲絲都係奉勸大家唔好亂信小道消息，以免贏粒糖但輸間廠。
（余絲韻）