領袖盃全長兩公里多啲，阿Ben話前兩年都完成到賽事，問到今年目標，佢好謙虛咁話順利完成就相當滿意，仲笑笑口話希望大家慷慨解囊，捐多啲錢支持佢跑。雖然阿Ben貴人事忙，未必抽到好多時間練習，但絲絲深信以佢高大嘅身形，跑呢兩公里「易絲執」啦。
多項舉措推動環保
講番個比賽，大家都知渣打積極推動環保，今屆馬拉松亦加入環保元素，例如減少運動員小冊子嘅用紙、重新設計選手包等，仲呼籲參加者喺當日盡量乘搭公共交通工具。據知單係今屆，渣打已經慳咗五十二公噸嘅碳排放，等於五千二百棵樹一年嘅碳吸收量，咁有意義嘅措施，絲絲當然舉手贊成，事關空氣清新啲，大家跑渣打馬拉松嘅時候都舒服啲啦！
（余絲韻）