自思捷環球（00330）前主席邢李㷧退下火線後，同佢打江山嘅老臣子唔係離職就係退休，連72歲嘅老臣子Jurgen Alfred Rudolf FRIEDRICH（現任思捷非執行董事）亦由上月開始減持思捷共約670萬股，套現2.5億元，不過個價與邢李㷧減持思捷股份相比就差好多。
根據聯交所股權資料顯示，Jurgen Alfred Rudolf FRIEDRICH喺上月二十三日至本月六日期間共減持思捷669.41萬股共套現2.5億元，每股平均價約38元，持好倉股權由5.03%降至4.53%。佢對思捷貢獻良多，喺一九七六年創立Esprit嘅歐洲業務，九七年起出任思捷非執行董事，當時邢李㷧係負責執行，佢喺幕後獻計。
不過，佢沽售思捷嘅時機唔及邢李㷧，後者投資眼光準，過去8年減持共套現233億元，其中一次喺○六年九月，以每股69元減持8,500萬股，套現約58億元。邢李㷧喺去年三月盡沽思捷股份，當時以每股54.25元配售約2,200萬股份，套現約12億元。
絲絲睇過思捷最新嘅年報之後，發現Jurgen Alfred Rudolf FRIEDRICH好勤力，雖然佢已退休居於瑞士，但每次思捷開董事會佢都會出席，證明佢喺思捷好用心用力。
（余絲韻）