市場熱線：卡姆丹克跟勢短炒

海嘯後遺症浮面

美中不足係成交僅多過700億元，窩輪成交已佔150億元，而且二三線股表現跟唔上大市，重汽（03808）唔知點解尾市急插兼成交大增，聯想（00992）連跌兩日去到三個幾月低位，同納指嘅強勢背道而馳，實力股都搞成咁真係冇眼睇。但隻金蝶（00268）又創新高，往績PE去到40倍開外，舊年尾高位都照樣回購；買股票唔難，但幾時放先至考功夫。

孟加拉魚缸暴瀉近一成，股民㷫到暴動示威；孟加拉被高盛封為「Next-11」成員，但熱錢隨時害死新興市場，越南已係例子，要做下一個世界工廠唔係人工平就得。個世界愈來愈唔平靜，舊年希臘全國大示威反對緊縮開支，英國大學生抗議加學費，糧食價格急升有機會重演○八年嘅大騷亂，有錢嘅怕通脹，冇錢嘅怕冇飯開，海嘯餘波都好難捱。

國家統計局定咗下個禮拜四公布經濟數據，因為要做埋全年統計嘅關係，比平時遲咗個幾禮拜，上個月定喺禮拜六公布令人以為有乜玄機，當時解釋係想定期喺每個月十一日公布，點知咁快自打嘴巴，今年只有五個月會係十一日準時發布；另一問題係保密不周，但近幾個月專家頻頻跌眼鏡，所以可以話有改善。

尋日有消息話海爾電器（01169）又搞重組，由A股嘅青島海爾做製造業旗艦，會向海爾買佢洗衣機同熱水器業務，從此一統白色家電江山；至於海爾就改行做分銷、物流同零售，變身做「農村國美」。據知情人士話，呢個可能性其實好高，但就冇時間表，因為咁大單deal其實有排搞。

勝在市盈率夠平

呢輪嘅強勢股非保利協鑫（03800）莫屬，近7日有6日創新高，亦帶起埋同類股卡姆丹克（00712）。講到規模，卡仔當然唔及協鑫，但勝在PE夠平，協鑫炒到咁高，換入卡仔追吓落後都啱數。

買太陽能股要揀上游企業，因為上網電價計埋補貼都係好低利潤，但上游企業因需求增多而有着數。卡姆丹克主要做單晶硅芯片，據知單晶硅電池轉換效率最高，技術最為純熟，但成本亦較多晶硅為高，再數落去係尚未成熟嘅薄膜技術。

無可否認，做多晶硅嘅協鑫暫時係最食正依家潮流，但卡姆丹克一○年預測PE得6倍幾，去年頭三季成績表一季好過一季；太陽能將來點發展冇人知，買股嘅嘢亦今日唔知聽日事，但卡仔短線有睇頭。

戰報

勝獅貨櫃（00716）+12%

高仁上周二認為勝獅可重拾升勢，昨日曾高見2.98元，較推介時低位2.64元，累升12.8%。

高力集團（01118）+15%

桃桃上周五推介高力時，低位只有1.1元，昨股價隨大市做好創52周新高位1.27元，勁升逾15%。

古勝