絲絲講場：張耀堂離Visa叉吓電先
喺銀行界做咗好多年嘅張耀堂（Sunny），一年幾前去咗Visa出任香港及澳門地區總經理，絲絲聽講佢已經辭咗職，明年初就會正式離任。
Sunny依家放緊假，佢遲啲會與屋企人過澳門玩番幾日，之後就會留喺香港，響應「留港消費、刺激經濟」。
Visa發言人話，Sunny會喺一月七日正式離任，佢嘅職務暫時由喺Visa做咗十幾年嘅辛瑋達接手，不過暫未知會由邊個繼任佢個位。
零售銀行經驗豐
Sunny喺零售銀行方面有好多年經驗，先後喺花旗、道亨及星展香港做過，離開星展香港後抖咗一排，喺去年初加入Visa；由於當年信用卡剛啱喺香港推行嗰陣，Sunny已經有份參與，所以當時大家都覺得佢與銀行傾信用卡業務真係駕輕就熟。雖然Sunny冇話之後會做乜嘢工作，不過以佢咁豐富嘅經驗，喺依家零售銀行變化咁大之下，若然重出江湖做番銀行工作絕對係好事。
余絲韻