絲絲講場：王冬勝早餐會教SELL客
滙控（00005）嘅高層每年都會與同事開吓早餐交流會，絲絲八到，滙豐亞太區行政總裁王冬勝（Peter）早前就搞咗個早餐會，與60位同事交流意見，Peter仲準備咗長達40分鐘嘅演說，重點係話銀行嘅交叉銷售唔足夠，睇嚟前線員工新一年嘅目標已經好清晰。
據知Peter覺得佢哋嘅交叉銷售唔足夠，希望各個部門要緊密合作，藉着提供全面服務以提升業務表現。佢舉咗個有趣例子說明，原來要喺分行吸納一個卓越理財客戶，當中嘅宣傳及成本平均要1,000蚊；但如果喺本身有業務來往嘅企業，順道吸納呢啲企業嘅員工成為滙豐客仔，滙豐付出嘅成本就係零。Peter語重心長咁呼籲同事，做生意嘅方法應以「One Bank」（一家銀行）為目標。
分行悉心布置賀聖誕
尋日係平安夜，滙豐旗下嘅分行好熱鬧，佢哋為北角區嘅分行悉心布置，擺放咗唔少聖誕節裝飾如雪人及吉祥物等。滙豐香港區個人理財業務零售主管韓克強亦親自到太古分行派糖果，佢話喺太古住過十幾年，今次落區與眾同樂，感到倍加親切。
滙豐仲準備咗啲聖誕老人扭蛋機，原來部機係用嚟籌款，只要小朋友捐出零用錢就可以抽一次，所得款項會捐畀聯合國兒童基金會。
余絲韻