孖妹缸湖遊：航空股從旅遊出發

炒股票嘅散戶都知道，股市循環有起有跌，而旅遊業亦有旺季淡季之分。身為康泰旅行社太子爺嘅黃進達，孖妹心諗佢細個時一定唔使捱苦，點知原來佢父親黃士心施展「地獄式訓練」，從小已教佢點做生意。

哈哈，孖妹覺得炒股票與做生意冇乜分別㗎，一樣都係投資嘛！不過，Jason就話自己手頭上一隻股票都冇。唔係嘛，但係你做生意好有心得喎，令人有啲難以置信。

黃：康泰旅行社董事總經理黃進達

股市與旅遊息息相關

高妹：呢個十二月港股表現麻麻，我同祺祺本來計劃去日本玩，依家都改咗去北京，一來價錢平啲，二來貪北京與日本一樣有雪落嘛。咁你哋聖誕檔期嘅生意又點呀？

　黃：今個聖誕節生意比去年同期增長8%，主要集中到台灣、新加坡旅遊。由於我有好多客人都有買股票，所以我都知道近排港股跌多過升，要知道當股市大升時，客人賺到錢，自然會揀啲靚團去報，可見股市與旅遊市場有莫大關係。不過，冇錢又唔係冇得去旅行嘅，大家可以選擇內地團或者短線團，價錢比較便宜。

祺祺：講得啱！炒股票都係同樣道理，少錢咪炒細價股，多錢咪炒藍籌股囉。最緊要係揀中隻靚股，然後賺大錢啫。

　黃：投資有賺有蝕，而且經濟狀況與股市走勢較難捉摸，散戶好難同隻股票講感情。其實股市升跌就好似旅遊生意有旺淡季之分，不同節日都有不同線路配合，由於情況明顯，我哋可以因應日子去安排機位、酒店及人手以配合市場需要。不過，股市轉勢就未必好清晰，所以散戶要立即作出投資部署就難啲。

高妹：既然你都話今年聖誕節生意有增長，即係多人坐飛機，咁航空股走勢應該向好喇。你自己又有冇買番啲航空股呀？

黃：其實我冇買股票好耐喇，依家手上都冇揸航空股。

買「磚頭」人仔較穩陣

祺祺：聽講你以前買嘅股票主要係銀行股及地產股，點解依家手上竟然一隻股票都冇？

　黃：我比較鍾意做生意，加上現時工作好忙，根本冇時間去睇住股價升跌，有時間都陪吓屋企人喇。如果畀我揀，我始終覺得投資物業好過買股票，「磚頭」點都穩陣啲嘛。我都睇好人民幣升值，所以間唔中都有兌換番啲人民幣，之後存喺銀行慢慢收息，回報都唔錯㗎。

高妹：過去香港經歷過九七年金融風暴、○三年沙士、○八年金融海嘯，對散戶有好大衝擊，旅遊業更首當其衝受到影響，喺呢啲逆境中你學識咗乜嘢呢？

　黃：以積極態度去面對突變，平時要積穀防饑，更要將風險分散於不同市場。例如現時日圓高企，客人到日本嘅消費力自然減弱；另外，南北韓局勢緊張，唔多唔少都會影響報團人數。由於聖誕節關係，去呢兩個地方嘅客人主要都係滑雪，於是我哋就建議客人轉去美加、歐洲或中國東北等地滑雪，所以我哋平日努力開拓新嘅滑雪景點，其實係實踐分散投資之道。

拓景點實踐分散投資

祺祺：好似投資咁，千祈唔好只買一隻產品，而要分散投資於股票、債券、黃金、基金及人民幣等產品，將風險減低。

眼見Jason三十出頭已經將旅遊生意搞得有聲有色，相反近期孖妹嗰盤股票生意就唔多見有起色。與太子爺傾完偈後，我哋都學識咗四個字，就係「穩中求勝」，「股神」巴菲特都有話，「唔要你好聰明，只要你少犯錯。」點解？即係提醒大家投資要夠穩陣囉。弊！孖妹掛住講，唔記得問Jason有乜嘢團介紹添。

內地航空股飛唔起

近期港股真係好難玩，搞到個個都話「炒股唔炒市」。孖妹諗住聖誕節快到，航空股表現會「起飛」喇，點知摷番資料睇，發現啲航空股好似飛唔郁喎！Jason坦言中國旅遊市場真係好大，因為人口多嘛，如果有一億人出去外國旅遊，都已經浸晒個市場喇。

年頭年尾淡季殺價

不過，孖妹睇到輝立證券董事黃瑋傑嘅專欄，先知道原來十二月及一月係內地航空業淡季，好多航空公司會採取大幅度折扣促銷方式去吸引客戶，甚至推出「秒殺機票」，票價低至一折或幾十蚊，唔怪得今個月啲內地航空股炒唔起喇。

不過好彩黃師傅話，內地三大航空股過去一個多月嘅跌幅已經反映唔少不利因素，所以再跌嘅空間有限。

60.5%散戶 聖誕唔買滙豐

本地股場有「聖誕鐘，買滙豐」之說，皆因滙豐控股（00005）每逢年底嘅股價表現一般都會較好。今個聖誕你會買滙豐嗎？據今期《東方產經》網上民調截至上周末晚上6時嘅結果顯示，39.5%人話會買，60.5%人就話唔會買。

高妹、祺祺

若有料報畀高妹同祺祺或有嘢問，可電郵money.biz@opg.com.hk