市場熱線：中化肥調整近尾聲

期指上周五曾短暫跌穿22,500點，但好快就抽上帶動現貨回升，成交維持725億元，扣埋遠地（03377）批股嘅53億元，其實成交縮到得670億元。今個禮拜開始放聖誕假，成交會更加水盡鵝飛，但唔代表魚缸會風平浪靜，尤其大戶呢排鍾意玩突擊，失驚無神挾上挾落，成交少更容易本小利大。高盛盤房主管喺香港成立對冲基金，依家已經係對沖基金年代，傳統基金反而愈來愈少人吼，所以傳統智慧話年尾基金粉飾窗櫥未必行得通，港股呢排咁波動，都係班對沖基金興風作浪。

大唐新能源（01798）同合生元（01112）破底相當正路，睇同類股表現已可知一二。新股吹冷風，搞到中聯重科（01157）傳以14.98元下限定價，呢隻股好多專家建議認購，若真的以接近下限定價，睇PE及同類股表現都顯得吸引。而今日掛牌嘅百富（00327）以中間價落錘，呢隻反而較有炒味。老古之前覺得幾有概念嘅世達（01282）表現唔錯，第一日緊守招股價任你買貨，跟住兩日均見上升。

家電下鄉有排玩

國美（00493）股東特別大會順利通過黃光裕兩個代表入董事局，股價重上3蚊樓上，但兩隻家電股海爾（01169）同科龍（00921）再創新高更為難得，尤其海爾更係老古心目中嘅一○年股王，家電下鄉話以後會長期玩，唔似汽車咁樣優惠有期限。國策幫農民增加收入，然後鼓勵佢哋消費，遲吓嘅《一號文件》又或者可以帶動農業股，亞果（00073）、一拖（00038）、中化肥（00297）同今日派成績表嘅中綠（00904）都升3%以上，但中海化學（03983）卻下跌，原因係中央對尿素等化肥出口收75%特別關稅，以穩定內地化肥價格，但中化肥嘅鉀肥主要靠入口，所以唔受影響。

孖屣擔心中央會限制化肥價格，所以中化肥10日內9日收陰燭，上周五反彈4.72%，可算低位回穩。鉀肥靠外國入口，市場對價格管制反應過敏，中化肥可做短線買賣，博反彈重上4.4元，跌穿上周四低位3.8元則止蝕。

戰報

中盈國金（00766）+9.6%

詩詩上周五指中盈現價值博，股價果然有異動，並一度高見0.51元，以低位0.465元計，單日升幅9.6%。

金山能源（00663）+12.7%

帥哥本月七日推介金山能源，當日低位只有0.196元，上周五股價高見0.221元，累積升幅12.7%。

古勝