美國啱啱至出完QE2，又放風要加碼，商品價格再飛天，金價更創新高，故資源股值得留意。新進煤股金山能源（00663）尋日有異動，逆市升4%，以0.206元報收。講到金山能源，詩詩九月曾推介，當時股價於0.18元水平，其後公布斥資35.4億元收購山西兩座煤礦，一度炒到0.28元，之後回落，低見0.175元，重回起步位。
集團積極擴展煤炭業務，目標是煤礦年產能達2,000萬噸。去年收購的內蒙煤礦今年產量約400萬噸，明年料可增至660萬噸，加上今次收購，產能增至1,300萬噸，但仍跟目標有距離，可見收購步伐未會停止。
從之前股價表現睇，呢隻股仔一係唔郁，一郁就相當「兇殘」，故宜量力而為。不過，是次收購交易代價中，除1.8億元現金外，其餘以發行新股及可換股債券支付，其中新股作價0.2元，而債券換股價為0.21元，故可以相信，0.21元樓下都係可以入貨嘅水位，短炒博見0.25元，止蝕0.18元。
詩詩