財經新聞經常會報道巴黎CAC指數升幾多跌幾多，由此可見法國股票市場其實都好有江湖地位，咁金融海嘯、歐債危機對佢嘅影響有幾大呢？其實香港唔係咁多人知。
財經公關公司博達近日畀一間法國公關公司Havas入股，成為後者嘅集團成員，Havas董事總經理Stephane Fouks話，佢哋睇好未來中國及香港嘅市場先至入股博達，佢叫絲絲估吓，今年法國有幾多家公司IPO？呢條問題唔單只考起絲絲，就連年資及經驗比絲絲高幾班嘅老友都唔識答。最後Stephane豎起4隻手指，話成年只係有4家。嘩！香港今年有84家新公司上市，連法國品牌歐舒丹（00973）都嚟香港集資喎，唔怪得佢哋要向香港出發啦！
其實唔單只法國，就連香港人「潮拜」嘅日本，IPO市況都係咁弱。據知日本人喺依家嘅時勢下變得好穩陣，有錢都唔會用嚟投資買股票，淨係會買政府債券，全年IPO公司得嗰廿幾家，與以往一年有200家公司IPO差好遠，當地投資銀行等中介機構為咗生存，成立咗HKIPO Club，組織日本公司嚟香港，睇吓有冇上市機會。但絲絲問過老行尊，佢話實際上有好多難處，唔好寄望咁高喎。
余絲韻