貿發局有份搞嘅「亞洲金融論壇」已去到第四屆，喺下月十七至十八日舉行，今次主題係探討亞洲未來嘅發展機遇及挑戰，論壇策劃委員會主席洪丕正話，至少有30位講者答應出席，當中唔少係內地猛人。
呢個論壇唔單只係等啲人嚟聽吓嘢，特色係有個「項目配對環節」，畀機會參加者與來自世界各地嘅潛在業務夥伴會面，仲要係會安排一對一面談，咁樣分分鐘可以發掘到新商機。
唔好以為金融論壇只吸引從事金融嘅人參與，其實畀錢買飛入場嘅有四成屬於企業，三成屬於金融公司。據講部分參與者喺聽猛人演講之餘，會自己周圍去考察，有啲仲自己跑去深圳添，就算冇特別安排，都可以諗吓旅發局安排嘅節目。
呢個金融論壇始於○七年香港回歸十周年，○九年已吸引1,500人參與，來自31個國家及地區，採訪媒體都有成370個！今屆截至本月初已有900人報名參加，主辦當局相信下月先係報名高峰期，話呢個論壇主旨係「重質唔重量」嘅，最緊要多啲機構搵到商機！
余絲韻