香港老牌家族嘉道理喺外國買嘢，睇吓佢哋同大家投資眼光係咪一樣？根據英國《泰晤士報》報道，嘉道理家族旗下嘅投資公司Old Park Lane Management就快傾成一單「刁」，目標係買倫敦市中心West End區嘅一個寫字樓連5幢豪宅，如果成事嘅話，買入價將介乎7,000萬至7,500萬英鎊，即係約8.58億至9.2億港元。
West End區係英國嘅商業及豪宅區，差唔多等於香港嘅中環，樓價一啲都唔平，其實嘉道理家族已經唔係第一次喺West End區置業。傳聞Old Park Lane Management喺該區持有Coutts & Co.嘅總部，而Coutts & Co.就係英女王御用嘅銀行，來頭非常之大。
喺英國買物業嘅其中一個好處，就係可以「Freehold」，即係終身持有，唔會好似喺香港咁，地契要喺50年或99年後與政府續期。
根據一份測量師行報告話，英國今年首三季樓價只係升咗4.5%，而香港樓價喺同期就升咗21%，所以英國物業相對「低水」。
睇嚟嘉道理家族真係做足功課先至出手，眼光似乎唔錯喎。
余絲韻