絲絲講場：「新一代輪后」蔡秀虹周末出嫁
輪場嘅喜事真係一浪接一浪，睇嚟一眾「輪迷」又少咗個女神喇！事關今次要結婚嘅係「新一代輪后」──法興環球股票產品部策略師蔡秀虹（Eva），佢揀咗喺本周末（十一日）出嫁，當日筵開26圍。
義工結情緣已買愛巢
絲絲原本想揭吓通勝，睇吓嗰日係咪好日，點知Eva話自己個人雖然好傳統，但都冇擇日結婚！原因係佢真係好鍾意擺酒嗰間酒店，難得有場而又臨近年尾，所以就揀咗喺本周末擺酒，仲特登請咗律師喺入席前證婚。
Eva同佢未來老公仔喺5年前做義工識嘅，因為搞活動而結緣，喺一年前已諗住結婚。絲絲好奇想知點解拍咗兩年幾拖就決定結婚，Eva笑笑口答：「因為相處融洽。」真係好鬼Sweet！佢哋喺七月份已經買入愛巢，婚後會去澳洲度蜜月！
結婚當然係高興嘅事，但Eva話好擔心當日嘅氣氛及流程唔夠好，又驚安排令親友唔滿意。不過計絲絲話，Eva兩公婆工作咁忙都自己一腳踢籌備婚宴，賓客一定Feel到你哋嘅誠意，絲絲喺度祝Eva同佢未來老公婚後甜甜蜜蜜！
余絲韻