市場熱線：兗州煤業 穩步回揚

除咗美匯回升之外，祖國突然提前喺禮拜六公布CPI，咁樣做嘅慣例係想等大家周末放假冷靜消化吓消息，搞到股民反而心慌慌，中央解釋係想養成每月十一日嘅準時習慣。其實CPI高已係預咗，唔會令大家嘅血壓同步上升，就算加息亦未必要即時。

尋日319隻股票升、705隻跌，50大升幅榜當中唯一嘅大價股得中國南車（01766），事關間公司同GE組合營進軍花旗；依家祖國嘅鐵路技術愈來愈好，仲揚言出年要打破法蘭西列車嘅時速574.8公里紀錄，唔單止內地定單好景，海外定單亦愈來愈多。咁啱有個世界高速鐵路大會喺內地舉行，尋日兩隻鐵路基建股同告反彈。

零售旺炒埋收租股

日日講零售股真係幾悶，但係呢類股近幾個月最好炒，零售股同時存在有利同不利因素，但揀來揀去冇乜其他板塊可揀得落手。收租股呢排亦有人炒，零售旺炒埋收租股屬正路，而且班炒家由住宅轉咗去炒工商舖，美聯工商舖（00459）上個禮拜已一支箭咁飆升；而古勝早前建議喺5.5元附近低吸嘅美聯集團（01200），周一同周二曾低見5.52元後反彈。

新股最睇市場氣氛，賽得利（01768）尋日輕微潛水已算唔差，3隻能源股：MI（01555）、華能新能源（00958）同大唐新能源（01798）睇落幾牙煙，賣奶粉嘅合生元（01112）睇見同業表現亦心翳；但由高陽（00818）拆出來嘅信用卡碌卡機生產商百富環球（00327），由於業務獨特兼有內需消費概念，應該反應唔錯。

在下喺禮拜一曾預測煤炭股可回穩，事實證明冇錯，中央唔畀電煤加價啫，又唔係逼佢哋要減價，情況好過其他民生相關股好多。

天氣因素帶動需求

兗州煤業（01171）已率先反彈，其一原因係天氣凍令煤炭需求增加，而鄧普頓基金上個禮拜四見佢跌即增持。而中央限制電煤合同價加價幅度，70%賣現貨煤嘅兗煤受影響程度最細。

兗煤股價尋日重返各條平均線樓上，睇走勢喺21元至22.5元之間徘徊咗20日之後，已經完成咗整固，雖然好難期望兗煤股價再飛天，但如果能上番上次高位25蚊已經算唔錯，跌穿21蚊則止蝕，有一定值博率。

戰報

銀基集團（00886）+14%

小尾上周一指白酒漲價利好銀基，當日低位6.5元，昨日一度創7.44元新高，累升14.4%。

先思行（00595）+24%

帥哥上周一推介先思行，昨逆市做好，並創1.99元年內新高，較推介當日低位1.6元累升24%。

古勝