絲絲講場：葛霖正式講拜拜 滙控易帥靜雞雞交接
要選今年銀行界嘅大新聞，滙控（00005）高層大執位相信必定入圍。葛霖喺尋日董事會後正式退任滙控主席，由范智廉接棒，葛霖28年嘅滙豐生涯結束，不過唔代表佢會閒着，因為佢休息唔夠一個月就會接任英國貿易及投資大臣一職，到時話唔定會與范智廉有唔少交手機會。
新舊CEO獲選話題人物
記得喺九月時滙控決定主席接班人選，謠言滿天飛之餘仲非常峰迴路轉，搞到絲絲日日當連續劇咁追；可能當時太震撼，今次主席交接相對低調，連同駱耀文喺周三履新副主席一職時，亦聽唔到滙控有乜嘢動作或活動。絲絲聽聞滙控今日有個簡單儀式，將一個木座交畀范智廉象徵交棒。據了解，滙控自從前主席浦偉士以來，每逢新主席上任都有個傳統，就係送個刻有「The Buck Stops Here」嘅木座畀佢，意謂鼓勵繼任者唔好拖拖拉拉，要背起責任。
除咗葛霖及范智廉，滙控人事調動仲牽涉現任行政總裁紀勤嘅去留，大家都知道結局，就係五十出頭嘅歐智華遲啲會接任紀勤個位。滙控呢單嘢咁震撼，連《華爾街日報》日前都選咗歐智華及紀勤做今年話題人物。
渣打冧莊環球最佳銀行
呢邊廂低調易帥，另邊廂渣打（02888）就大事慶祝，皆因渣打冧莊成為「環球最佳銀行」，兩度鍊贏強敵滙控。今次渣打奪得由英國《銀行家》（The Banker）所頒嘅7個大獎，包括環球、亞洲及香港等地最佳銀行，當中亞洲及香港更係連續第2年獲獎。
所謂新人事新作風，范智廉執掌滙控後可能會帶嚟一番新景象，究竟明年嘅最佳銀行會花落誰家，大家要拭目以待喇。
余絲韻