呢個星期歐盟唔係好掂，又成為一個推散市場嘅理據，講真，歐盟為咗穩定債務問題，一定要繼續泵水，買債又好，印銀紙又好，正如筆者所講，呢個問題會成為一個「細水長流」嘅問題，真係有排煩，或者大家都喺度「自欺欺人」，享受世紀末的煙花，到時再算。
媒體朋友叫我做半新股專家，自己真係唔敢當，因為我都係不斷學習，喺某雜誌推介嘅四環（00460）、長興（00238）同華耐（01020）都係周初應聲而起，為上落市帶畀各粉絲股市新動力，一齊預備過一個快樂聖誕。
正如之前所講，半新股嘅數據太少，平均線又唔太成熟，一定要依靠成交同形態嘅配合，唔可以心急。大家都知啦，我哋係小散戶，資金有限，耐性好重要。好似我有一個粉絲，不斷用我嘅方法追蹤美即（01633），耐性同技巧缺一不可，見到佢開始慢慢掌握到，我都不知幾高興。
好多朋友成日話投資係好複雜，其實只要慢慢學，係一定學到。筆者以前讀化學系畢業，讀咁多書，冇一個課程教到我真實世界嘅投資，全憑自己跌跌碰碰先開始有小成，記住，有心唔怕遲，努力為上，多多分享，助人自助。
金活（01110）係筆者近期跟進嘅半新股，形態持續向上，配合半新股攻略要求，小注買入，跌破3.29元走人，如果冇事就畀佢飛出去，睇吓食唔食到聖誕黃金銷售檔期啦！
香港大學電子金融服務榮譽助理教授 徐燦傑