絲絲講場：莎莎掌櫃愈沽愈升
港股近期市況波動，絲絲唔少老友都話炒股難搵食，但一眾本地零售股就一於少理，好多股份仍炒個不亦樂乎，莎莎國際（00178）就肯定係其中一隻。近日唔少證券行都話睇好莎莎前景，搞到莎莎股價成日大幅波動，但莎莎執行董事兼首席財務總監陸楷就冇你咁好氣，佢耐唔耐就減持吓。
上月減持套1500萬
單喺上月佢已經減持咗168.6萬股，短短一個月就套現超過1,500萬元，應該可以「改善一下生活」。不過都唔夠七月嗰時咁勁，因為陸掌櫃喺七月一共5次減持莎莎，每次減持都係幾十萬股，所以未有為公司股價帶來太大壓力，佢喺七月減持時嘅平均價係6個幾，而上月減持時平均已經係9個幾，簡直係愈「減」愈升，有別於一貫公司高層減持屬股價見頂嘅傳統說法。近日歐資大行瑞信將莎莎嘅目標價上調到11蚊，並重申「跑贏大市」嘅評級，未知陸掌櫃會唔會等到11蚊先再減持呢？
余絲韻