市場熱線：北控水務 阿爺關照

花旗嘅製造業指數同私人新增職位都好過預期，其實老美嘅經濟數據一直幾好，只係孖屐驚住「歐豬」有乜冬瓜豆腐，咁啱尋日歐豬CDS同債息同步回落，美金回軟、歐元升，道指喺萬一關口頂得順，一時間孖屐集好多條件反彈於一身，但美匯指數點走法仲未明朗。

祖國管制物價卒之由根源入手，唔畀煤炭加價，但只限於電煤。喺○八年電廠蝕到入肉嘅時候，都未試過限制煤價，可見今次調控係滴水不漏。消息刺激衰足全年嘅電股小翻身，旺咗大半年嘅煤股就仆直。

金股仍有保障

不過，藥股都係被強迫減價，但聯邦制藥（03933）尋日就升夠有突；廣藥（00874）再創新高，但呢隻已係涼茶股而非藥股，大家睇住紅罐王老吉商標嘅爭奪戰。依家最有保障都係黃金股，石油股揀上游嘅中海油（00883）較有揸拿，雖然話新成品油定價機制已上報國務院，但成品油價格已有前科要向通脹讓路。

A股下晝升幅收窄到唔夠1%，但同香港好唔同，3隻AH同步嘅煤股不跌反升，大唐同華電嘅A股反而下跌，唔通祖國股民嘅腦袋構造零舍唔同？

入市要睇國策

本地零售股長升長有，好似六福（00590）折讓12%批股，但收市跌唔夠2%。除咗呢類股之外，其他股都要睇國策臉色，食用油唔准加價，中糧（00606）連跌6日；但啤酒計劃加價，青啤（00168）就反彈得有板有眼。究竟邊樣係必需品邊樣係消費品都好含糊，未受調控可能只係時辰未到。

至於個《一號文件》，祖國傳媒話今年重心唔再擺喺三農問題，而係改為將焦點放喺水利，水係農業嘅命脈，今年初西南乾旱帶出問題嚴重性，所以中央將水利作為優先處理任務係合乎何尺，其中包括治理水資源污染嘅問題。

香港上市嘅水股當然借題發揮，雖然話加水費短期已經冇可能，但水荒始終係長遠問題，中央其實亦時時刻刻話加強發展污水處理業務，「十二五」規劃亦將提高污水垃圾營運門檻，培養一批龍頭大佬。

常獲大行唱好

咁多隻水股當中，北控水務（00371）經常有大行唱好，走勢圖又幾得意，四月創咗3.26元新高之後，七月快速回落到2.23元，然後又以波浪式回升，幕後人鍾意製造旗形走勢，尋日升4%收報2.79元，已係連續4次「破旗」，根據每次破旗後均可升逾上次旗來睇，短期量度目標係3蚊，中長期則係後話，但長線亦係一隻值得睇好嘅股票。

戰報

信利國際（00732）+16%

帥哥昨日推介的信利，走勢強勁，最高升過上13.64元，以低位11.7元計，單日升幅有16.5%。

中國無線（02369）+12%

小尾周三建議睇位追入中國無線，昨日再創5.55元新高，較推介當日低位4.93元升12.5%。

古勝