股市有好多古老智慧，港人最熟悉嘅係「聖誕鐘買滙豐」，不過喺過去6年都唔啱使；喺美國類似嘅例子亦好多，例如美股有個理論叫人五月要賣晒啲貨，等十月先再入市。但古老智慧只係歷史，唔代表一定啱，依家美國仲搞埋量化寬鬆呢啲史無前例嘅嘢，自然會扭曲股市，如果跟晒傳統智慧去做，今年喺股市會輸得好慘。
八月一般都係股市會升嘅月份，不過今年就唔係呢回事，道指跌咗差唔多4.3%，係10年以來最差嘅八月；相反九月一般都係全年最差嘅月份，不過今年就完全反傳統，升咗成10.4%，係自一九三九年以來最厲害嘅九月。至於歷史上跌得最可怕嘅時候往往發生喺十月，今年道指喺十月就升咗3.1%。
古老智慧其中一句好多人識嘅係「Sell in May and go away」，頭一截今年就應驗，因為五月嗰陣股市差唔多係上半年嘅高位，但如果賣貨後冇買番，又或者喺唔啱嘅月份買，咁就蝕底咗。舉例話若等到十月尾先再買番，就完全錯失八月開始差不多成11.3%嘅大市升幅。
余絲韻