有「網股王后」之稱嘅星級互聯網分析員米克（Mary Meeker），本周一突然宣布離開已任職19年嘅摩根士丹利，跳槽至著名硅谷創投基金KPCB擔任合夥人，協助後者發掘新一代科網股明日之星。
米克本身係科網股分析界嘅先鋒，主管大摩全球科技研究團隊，係首批專責研究戴爾、微軟、網景、雅虎、亞馬遜及eBay等一眾科技界「新星」嘅分析員之一。米克喺九五年發表「互聯網報告」，準確預測科網股熱潮，睇好亞馬遜、美國在線（AOL）等股份，可謂「點股成金」，喺九八年更被財經雜誌《巴隆氏》尊稱為「網股王后」，聲名大噪。佢如今離開大摩，被英國《金融時報》形容為「一個時代的終結」。
雖然○○年科網泡沫爆破後，令一直唱好科技股嘅米克「一身蟻」，唔單只受到批評，甚至畀監管機構調查，但由於佢喺唱好嘅同時，不忘提醒投資者注意喺「瘋狂時期」買股會有風險，而且曾警告大部分科網股會「執笠」收場，結果逃過一劫，反觀當時有大量著名科網股分析員「冇得留低」，更確立米克嘅天后地位。
米克喺最近一份報告中，預測網絡廣告前景一片光明，年收入有500億美元，而流動網絡及社交網絡會爆炸性增長，並估計智能手機銷量喺二○一二年將超越個人電腦，話依家正係科技創新嘅新一波熱潮。
余絲韻