絲絲講場：跟貼國策樊綱撐低碳經濟
投資快人一步，財富快啲達到。當大家講緊低碳金融時，絲絲已經睇完新書《世界低碳發展的中國主張》喇。因公事關係，呢本書嘅主編、中國著名經濟學家兼中國改革基金會國民經濟研究所所長樊綱嚟咗香港，尋日朝早絲絲同佢飲早茶，樊綱話「近兩年香港空氣好似又差咗喎」。
最終結局係「雙贏」
大家都知道氣候變暖已經成為全球熱話，近年中國亦大力發展低碳金融，希望支援經濟結構轉型。樊綱直指最新嘅「十二五規劃」已經具體將低碳金融、低碳經濟列為重點，未來各行各業都需要節能並減少二氧化碳排放，例如係交通運輸行業，而內地有關部門亦已經研究緊細節。
實施低碳經濟初期或者會影響中國GDP，令部分產業嘅營運成本增加，但另一方面亦會令其他產業多咗新發展機會。但樊綱認為最終結局會係「雙贏」，當中國能夠進行更多減排時，技術轉移會有助提高能源效益，令各行業收入增加，最終帶動經濟發展。至於香港能否從中分一杯羹？佢就話：「香港最有可能進行國際碳交易，希望香港政府能夠多啲關注低碳議題喇。」
余絲韻