近排打壓樓市措施一籮籮，唔少按揭部嘅銀行家都要見招拆招，忙到透唔到氣，聽講喺政府出招嗰日，有銀行甚至通宵開會研究新政策，星展香港客戶、存款及抵押貸款高級副總裁鍾少權（Derek）當日就撞啱要跑「毅行者」，睇嚟佢一樣以平常心面對樓市辣招喎，但佢個電話就畀人「Call爆」咁滯。
絲絲聽聞當日政府出招消息一出，唔少穩坐辦公室嘅銀行家都覺得意外，而Derek就正參加毅行者比賽，當日好多人唔知佢跑毅行，所以不斷搵佢研究政府新招影響。Derek專心比賽，就梗係唔知咁多人搵佢啦，聽講佢星期一返到辦公室，發現個電話好似畀人Call到裂咗。Derek話收到消息時，心情冇乜特別，認為有適當調整係好事，雖然對業務有一定影響，不過依家樓市就真係健康咗。
今年係Derek第二次跑毅行者，去年佢係畀人「臨時征召」入隊，但今年就唔同，佢早有準備，不過佢話今年實在太忙，最後都係唔夠時間練習，表現冇去年咁好。毅行者一組4人，好講究團隊合作，Derek話成隊人經過第一晚洗禮後愈戰愈勇，後期反而行得快咗，最後用咗三十幾個鐘成功跑畢全程。
余絲韻