市場熱線：哈動蓄勢挑戰高位

地主股尋日回勇，正在修補上個禮拜嘅下跌裂口，仲未講得轉弱為強。祖國水泥價格創新高，水泥股升得特別勁，但因住樹大招風引來調控物價魔爪。

內地加息之期不遠

燃氣股個別發展，古勝上個月兩度推介嘅昆侖能源（00135）卒之起飛，破咗十月初高位，事緣並非公司公布向旗下附屬增資幾億單嘢咁濕碎，而係佢阿媽中石油（00857）將掛牌出售北京天然氣管道60%股權，餘下嗰四成由北控（00392）揸住，所以如果昆能投到呢檔嘢，即係同北控做襟兄弟，今年嘅表現可以後來居上。

滬綜指尋朝最多跌3.75%，雖然A股一向升跌都好無厘頭，但咁跌法亦非無因，中央每日唔係出口就係出招調控物價，關係到各行各業，睇唔通先沽貨係投資常理；另外，央行尋日發行嘅1年期央票得10億元人仔認購，創咗歷史新低，顯示利率唔夠吸引，而向公開市場吸收資金回籠嘅能力已基本消失，亦即距離加息嘅步伐愈來愈近。

大市有機先低後高

外圍都仲係嗰幾件事，道指隔晚萬一關口失而復得，但美匯指數企硬喺81樓上，歐元跌到1.30關，「歐豬」CDS創新高，魚缸仍有調整壓力，值唔值得撈底係睇閣下勇氣，呢大半個月調整期間，好多散戶已急不及待入市，十二月傳統上都係升多過跌，尤其「年尾例旺」幾乎個個股民都識講。

恒指十一月先高後低幾乎原地踏步，古勝認為呢個月有機會先低後高，穩陣嘅可以買內銀股，較進取嘅可以博內房股，因房地產商又開始踴躍投地，可見佢哋冇有怕。

股票升升跌跌好正常，羊群心態係大忌，好似哈爾濱動力（01133）年中時喺5至6蚊徘徊，當時PE只係幾倍貨仔，如果當時人棄我取，依家已經有成倍利潤。

雖然話間公司核電業務唔及東氣（01072）同上氣（02727），但同類股估值唔應該相差太遠；直到公司派中期成績表，原來核電發展其實唔落後，期內核電設備接單約達150億元人仔，較去年底增加8成，約佔總營業額達15%。

PE較兩同業吸引

孖屐由七月開始猛追呢隻落後股，展開4個月嘅「長征」，升到12蚊至停步，然後回落到10蚊邊，尋日再逆市升到11.68元收市，睇個勢有機會再挑戰新高。雖然哈動已非「大平賣」，但計預測PE仍係十幾倍，較兩隻同類股仍係吸引，祖國「十二五」大力發展水電更加係開正佢嗰瓣。

戰報

威高股份（01173）+20%

帥哥昨日推介的威高，低開之後反覆向上，最高見0.53元，以低位0.44元計，單日升幅逾兩成。

茂業國際（00848）+10%

小尾上周四指茂業估值低可買入，昨高見4.08元，以推介當日低位3.68元計，累計升逾一成。

古勝