孖妹缸湖遊：年尾掃貨待調整出擊

孖妹尋晚去完尖沙咀Shopping，先發現維港周圍嘅燈飾已經亮起，聖誕節就快到喇，又係掃貨買靚衫嘅時候。呢排唔少舖頭已開始大割引，而港股就由近25,000點震落23,000點樓下，啲股票亦開始打折，但無論買衫定炒股，最怕係仲有Final Sale（最後減價），會愈減愈平。孖妹冇水晶球，不如請教著名基金經理蔡雅頌指點迷津喇。

行健資產管理首席投資總監蔡雅頌：港股下月仍會有波動，一旦調整就係入市時機，可準備彈藥放膽買貨。

現擔任行健資產管理首席投資總監嘅蔡雅頌，喺○七年以年薪4,243萬元榮登「打工皇帝」，佢喺舊公司惠理基金主理當時嘅中華ABH股基金，○○年至○七年間回報超過9倍。蔡雅頌曾被封為「香港及中國20大最佳買方分析員」，揀股技術高超，為咗挑戰自己，佢喺○八年與基金經理潘振邦成立咗行健資產管理，當今年九月大部分投資者覺得港股「牛氣沖天」時，佢已預期恒指隨時會喺市場情緒一面倒之下進行調整，佢仲提醒投資者喺十一月要步步為營。

蔡：行健資產管理首席投資總監蔡雅頌

準備彈藥下月買貨

祺祺：恒指喺兩個月內升過上差唔多25,000點，可惜之後又碌番落嚟，個市好唔穩，係咪應該忍手到明年先買貨呢？

　蔡：港股嘅負面因素現時未必已完全反映，相信十二月仍會有波動，一旦調整就係買貨時機，散戶可準備彈藥放膽喺十二月買貨，唔應該放晒啲貨畀大戶。市場仍擔心中國加息、通脹升溫及銀行收緊貸款額度，當市場未釋除所有憂慮，會增加股市波動，但我對後市唔會睇得太淡，大家唔使咁擔心。

高妹：其實我唔只擔心大陸，仲好驚愛爾蘭拖累港股，你又點睇？

　蔡：歐洲嘅問題唔可以短期內解決！歐洲好多國家嘅財赤超越極限，唔係兩、三年就可以解決到。就算救到希臘及愛爾蘭，好多國家嘅負債及財赤佔國內生產總值比例仍好高。歐洲就好似一個老人家，面對人口老化問題，某程度上似行番日本條舊路，好多經營家族生意嘅企業都因為冇下一代繼承而開始衰落，唔似得美國咁有動力，有咁多年輕後進廿幾歲就成為大公司主席。

天璽

消費動力強撐內需股

祺祺：我又唔驚喎！美國印咁多銀紙，香港依家簡直係「熱錢滾滾來」！我諗啲熱錢唔會好似現代男歡女愛咁Easy Come Easy Go（快來快走）啩？

　蔡：熱錢一定有流走嘅一日，但你寧願有錢嚟定冇錢嚟？股市永遠都係一個周期，你買咗任何一間公司都希望有其他人入嚟推高股價啦！

高妹：你成日話揀股唔揀市，有冇邊個行業睇好多啲？

　蔡：內需股較睇好，當民眾收入增加，佢哋由以前淨係買衫着，升級為買車買樓，跟住仲可能想買保險，都係人類歷史周期。中國人口夠多，永遠都有窮人想變成有錢人，可增添消費業動力，消費業前景應該好亮麗，除非你對中國冇信心。

祺祺：銀行係百業之母，中國經濟勢頭咁勁，有人話喺「八行」中求其揀隻都冇死，係咪真㗎？

　蔡：內銀股要面對Endless Worry（永不完結嘅憂慮），當你驚完佢要供股集資，可能又要擔心佢嘅貸款質素、明年嘅新增貸款額度甚至係通脹，喺高通脹而加息慢嘅低息環境下，對銀行業根本唔着數。當恒指大幅飆升，市場會買入內銀股追落後，係因為驚蝕底先買。雖然依家內銀股平，但如果只係因為市盈率及市帳率低而買入，咁嘅想法可能太簡單，我覺得有其他更好嘅選擇。

黃金要捧港股趨升

祺祺：你鍾意由下至上（Bottom Up）揀股票，近排有冇邊隻心水？

　蔡：有啲工業股都仲係吸引，好似做傢俬嘅敏華控股（01999），依家美國市場咁棘手，但呢間公司上半年喺美國嘅銷售增長仍超過70%，喺惡劣環境都有咁強勁嘅增長，證明佢哋喺產品方面做得好出色。

祺祺：我個投資組合裏面已經有七成係港股，如果我想買多啲其他投資產品，有冇好介紹？

　蔡：我覺得明年係投資嘅黃金檔期，首先大家應該投資黃金，當乜嘢貨幣都唔值錢，黃金基本上就係對沖，所以好吸引。另外，有多種資產嘅前景都有障礙，譬如你買債券，你見債息開始抽升，如果再擺錢落債市就唔太Make Sense（合理）。中國亦有推出壓抑樓市嘅措施，意味資金流入內地樓市嘅機會愈嚟愈細，所以主力可吸取流動性嘅市場就係股市。至於港股流通性大，而且好多公司估值都仲好吸引，當不明朗因素穩定後，投資者又會再留意股市。

高妹：我就覺得做好自己份工，都係一種重要嘅投資。你做咗基金經理咁多年，覺得點樣先可以成為一個成功嘅基金經理？

　蔡：我唔算係一個好成功嘅基金經理呀！但我覺得要肯去多聽多睇，建立一套自己嘅分析，仲要好享受見識優質企業嘅機會。當我見到啲好公司會好開心，就好似女人見到啱心水嘅靚衫一樣咁興奮！