市場熱線：威勝盡享龍頭優勢

上周五兩韓又炮聲隆隆嚇親港股，恒指收報22,877點，但22,800點批牛終於被人劏咗，散戶嘅信心指數肯定愈來愈淡，成交再縮到得663億元，扣埋成交暢旺嘅窩輪牛熊證，散戶買貨意欲其實已回到八、九月時嘅起步位。

不過，要根據相反理論「人沽我買」又似乎未夠淡，總之呢幾日睇定啲較好，尤其「歐豬」麻煩多多，CDS繼續炒高，「雙牙」等住輪流落水，甚至比利時亦排住隊，歐盟個救豬基金遲早乾塘。美匯指數已升穿80呢個阻力位，專家話美金逢高就沽又領嘢。

恒指跌177點唔算多，但藍籌、紅籌、國企成分股各只得3隻升。大笨象（00005）卒之跌穿80蚊，連100日線（79.45元）同250日線（79.67元）都危危乎，佢歐洲咁多生意始終擇使，buy and hold精神已死，聖誕鐘已唔興買滙豐。

依家係零售股當道，莊勝百貨（00758）、先施錶行（00444）、先施（00244）、漢登（00448）、鱷魚恤（00122）、寶光（00084）三年唔發市，發市當三年。漢登係南韓概念股，但炒起上嚟都唔理得兩韓局勢緊張。新股金活（01110）再炒高22%，但醫藥分銷龍頭股國藥（01099）反而愈跌愈低，炒新股可以唔睇PE，但如果諗住揸中長線就不能唔理PE呢個地心吸力。

智能電錶市佔率高

傳聞祖國水電燃氣一律唔准加價，電費冇得加一早預咗，發改委上個月建議嘅「階梯電價」唔知幾時實施，但應該唔受限價所影響。做電錶嘅威勝（03393）係階梯電價嘅受惠股，因為唔想交多啲電費，大家庭可能要「分錶」，未來電網要做到「一戶一錶」，電錶改造費支出由電網承擔，並要喺未來三年內完成改造。

威勝股價連升兩日，但相信係因為賣咗一幅地嘅新聞有關，套現兩億人仔，賺咗約9,000萬元，同今年全年成績表扮吓靚，公司中期僅賺多6%，今年頭兩次電錶招標結果都好低價，所以今年股價表現幾差。國家電網前排公布今年第三批智能電錶中標結果，威勝繼續係龍頭，而且今次中標價上升，因為國家電網唔係再用「價低者得」準則，對行業保持毛利率有一定幫助。

國家電網剛公布第四批智能電錶投標結果，威勝在單相電錶及三相電表均大豐收，市佔率遠遠拋離對手。

買威勝要有心理準備全年成績表未必夠照，所以亦拖住股價後腿，但未來兩、三年會有好大批電錶招標，值得趁低吸納。

戰報

華彩控股（08161）+16%

桃桃上周四指華彩增長前景樂觀，上周五高見0.38元，以推介當日低位計，累積升幅16.9%。

第一拖拉機（00038）+11%

小尾上周二指一拖挑戰52周高位，上周五果然創8.56元一年新高，較推介當日低位升11.1%。

古勝