孖妹缸湖遊：基金跑贏冇花假

「粉飾櫥窗」係乜嘢？市場一般嚟講，係指基金經理喺每一個季度，即係每年嘅三月、六月、九月及十二月尾，都會交出一份季度成績表，有時候為咗令到張成績表出色啲，基金會喺最後關頭大手買貨，入市態度亦會更加進取，希望乘機追回落後咗嘅表現。基金經理踴躍買股，自然有助推升股市，所以唔少散戶都樂見「粉飾櫥窗」，希望借勢獲利。

「女為悅己者容」，美國第二輪量化寬鬆（QE2）咪又係化妝品！化妝後不但美股升，連港股個樣都執靚埋，恒指差啲掂到25,000點，睇見基金及散戶都爭住買股票，就知呢隻「QE2粉底」遮瑕度唔錯啦。至於「粉飾櫥窗」係咪提早展開？咁就要問吓曾經幫過「韓國股神」朴炫柱打工、現職中信証券國際投資管理基金經理嘅賴子健喇。

賴：中信証券國際投資管理基金經理賴子健

粉飾表現自欺欺人

高妹：好快就係基金年結，依家港股走勢凌厲，相信好多基金經理都唔會提早收爐，你又點睇後市呀？

　賴：可能散戶對基金經理真係有少少誤解，以為我哋喺聖誕節一定會放假唔做嘢，臨近年尾又會提早收爐，其實呢啲都未必係事實，至少喺過去幾年嘅十二月，我都有返工呀！講番市況啦，短期而言，以中國市場為例，喺宏觀經濟狀況、企業盈利增長、資產升值等方面，我都睇唔到有負面因素出現，所以我對港股今年最後個幾月嘅表現係樂觀嘅。

莉莉：講起誤解，我真係想問吓，其實你哋基金界有冇「粉飾櫥窗」呢回事？

　賴：我唔知人哋點做，我自己就冇做過，因為覺得「粉飾櫥窗」冇乜意義。以今年汽車股升咗咁多為例，如果我冇買過車股，咁係咪要趁年底前買番一、兩隻汽車股，令個組合變好睇啲？咁做其實係自己呃自己囉，又正如今年有啲股票跌咗好多，例如航運股整體表現麻麻，如果我本身買咗，唔通又要喺最尾兩日沽咗佢？我唔認為呢個係專業做法。

贏大市靠真材實料

高妹：其實「粉飾櫥窗」都只係市場講法，投資始終都要靠自己嘅技術。

　賴：當股市十分波動，又或者一隻股票價格大升大跌時，大部分投資者都會為自己嘅投資行為尋找藉口。我認同散戶對基金經理、機構性投資者嘅行為了解唔多，透明度低亦令佢哋覺得市況有明顯波動時，就一定以為係基金作怪，但呢方面我真係唔太認同。買基金當然想有正回報，我建議投資者評價一個基金組合表現時，應該全面啲去睇，而唔係單一睇某幾隻股票。

高妹：我見市場上有啲基金表現勁到大幅拋離基準指標，當中又有乜獨門技法？

　賴：我相信係取決於整個基金組合嘅投資風格，當基金經理及分析員都肯做多啲基本因素研究以及去見多啲公司，對市場及企業營運嘅了解會多咗，自然能夠做出更多正確嘅投資決定，令基金表現更加出色。

報表揭示基金風格

莉莉：不過我同高妹炒開股票，對基金認識有限，有時望住張Fact sheet（基金報表），都唔知睇邊啲資訊先至有用。

　賴：雖然Fact sheet嘅資料唔算多，但都有參考作用㗎，除咗睇吓每月基金表現之外，你可以睇埋首五大或十大嘅基金持股，因為股票嘅買賣變動可以令你知道成個股票組合調整係咪頻密，經過長時期「跟蹤」，你甚至可睇到基金經理嘅投資喜好，從而摸索到呢個組合嘅運作風格。

新能源股投資亮點

高妹：二○一一年好快就到，不如講吓明年睇好邊啲行業啦！

　賴：近年中央政府一直推出扶持內需嘅政策，希望可提升內部消費、減低對出口嘅依賴，而呢個方向未來亦唔會變，加上內地中產階層逐步擴大，中高端消費品會成為主要消費目標，內地本土品牌發展空間亦好大，長期而言內需可以推動經濟增長。

莉莉：投資內需股好似已變成潮流，相信明年依然會受散戶追捧，咁仲有冇其他投資新亮點呀？

　賴：喺「十二五」規劃內，節能減排亦係一個新亮點，呢個規劃會控制能源消耗總量，鼓勵太陽能、風能、地熱能等可再生能源嘅發展及使用率，所以大家都可以留意一下新能源股。

化妝都有落妝嘅時候，QE2帶動大市嘅氣氛過後，散戶最終都要面對環球經濟不明朗嘅現實。雖然依家港股氣勢強勁，但唔代表你哋買賣愈頻密，賺錢機會就愈多。最後，孖妹想起英國作家卡爾森嘅說話：「不停的賣出買入股票，不會令你致富，致富的是你的股票經紀！」祝各位散戶好運。

QE2推升股市 47%散戶有錢賺

自從美國落實第二輪量化寬鬆措施（QE2）後，全球股市受惠揚升，恒指更勇闖25,000點關口。QE2落實後，你喺股市中有冇斬獲？據今期《東方產經》網上民調截至上周末晚上6時嘅結果顯示，47%散戶話有斬獲，其餘53%就話冇。

高妹、莉莉

若有料報畀高妹同莉莉或有嘢問，可電郵money.biz@opg.com.hk

小啟：因版面調動，《iBank新鮮人》及《女生投資周記》兩專欄移刊B10版投資天地。