市場熱線：華創盈利能力提升

上周五恒指跌477點，國指跌逾3%，滬綜指插5.16%，再度失守3,000點，深成指下瀉7%。深滬港喺亞運會高台跳水擸晒金銀銅牌。不過，經過周末冷靜期又好似冇咁恐怖，財政部否認加印花稅傳聞，愛爾蘭有歐盟救，德國股市倒升，美金升幅收窄，道指跌90點算少，但ADR又未見有乜反彈。

總之，依家中國有感冒，全世界都要打乞嚏，外圍商品價格跟住一齊跌。今日本地魚缸有冇得彈，仍要向北望，商品期貨上個禮拜五可能未跌夠（普遍跌5%就停板），A股亦一向好難估。恒指上周五如非地主股同利豐（00494）頂得兩嘴，可能連兩萬四都不保，但亦有托住地主股來沽其他嘅感覺。資源股自然跌得傷，關於QE2美金貶值一沉百踩，其實好有可能誇大咗，QE1實施之後美金亦曾不跌反升。

上周五有得升嘅紅籌國企指數股得兩隻：北控（00392）同華潤創業（00291），前者因為北京進行天然氣聽證會，有加價希望。華創一向穩穩陣陣，皆因佢做超級市場，主要係賣日用品，通脹可以買少件衫，但日用品唔慳得，轉嫁成本畀消費者嘅能力亦最高。而且，超市有唔少存貨，通脹帶動售價，存貨因而升值，變相得益咗。

內需概念夠煞食

華創另外兩瓣業務係啤酒同五豐行，雪花啤全國銷量最高，未來會繼續收購其他啤酒廠去壯大，雖然冬天唔係飲啤酒季節，但講到內需概念，「超市+啤酒」令佢同百麗（01880）成為藍籌兩隻內需王，收購Pacific Coffee之後又多一瓣，出年會同星巴克正式拗手瓜。至於五豐行啱啱宣布牛肉加價，但肉在砧板上，師奶亦冇符。

華創睇落可能較悶，但長線投資唔少得佢，芬佬買中國概念股時佢亦係必然之選。公司喺內地嘅超市愈做愈大，未來將可見「規模效益」，20倍PE以上未必隻隻股受得起，但華創肯定係其中一隻。

戰報

中盈國金資源（00766）+17%

桃桃上周一指中盈升勢未盡，當日低位0.495元，周五一度高見0.58元，升幅達17%。

國中控股（00202）+10%

詩詩上周四建議買入國中，周五逆市呈強，並高見1.04元，較推介當日低位0.94元升逾一成。

古勝